Sunday, October 25, 2015

അബസ്വര സംഹിത - പന്ത്രണ്ടാം ഖണ്ഡം


കൊടുത്തും കൊണ്ടും അബസ്വരസംഹിത പന്ത്രണ്ടാം ഖണ്ഡത്തിലേക്ക്...

                                                                     551
                                                                     *****
04.06.2015
മാഗിയിലെ തട്ടിപ്പുകൾ പുറം ലോകം അറിഞ്ഞിരിക്കുന്നു.

പരസ്യങ്ങളിൽ വീണ്‌ കണ്ണിൽ കണ്ടെതെല്ലാം ആരോഗ്യകരമെന്നു കരുതി വാങ്ങി വിഴുങ്ങുന്നവർക്ക്‌ ഒരിക്കൽ കൂടി പണി കിട്ടിയത്‌ പരസ്യമാക്കപ്പെട്ടിരിക്കുന്നു.

മാഗി മാത്രമല്ല ആരോഗ്യവും എനർജിയും പോഷണങ്ങളും മൊത്തമായി കുപ്പികളിലും പാക്കറ്റുകളിലും ആക്കി വിപണനം ചെയ്യപ്പെടുന്ന മറ്റു ഉൽപ്പന്നങ്ങളുടെ അവസ്ഥയും വ്യത്യസ്ഥമല്ല.

ഈ വിഷയം ഒക്കെ പണം എറിഞ്ഞ്‌ മാഗി കുളിപ്പിച്ചെടുക്കും. വീണ്ടും അവർ പരസ്യം ഇറക്കും. ജനം അത്‌ വാങ്ങി മൂക്കറ്റം ഇനിയും കയറ്റുകയും ചെയ്യും.

ഇത്തരം സാധനങ്ങളുടെ പരസ്യങ്ങളിൽ ആരോഗ്യത്തിനു ഹാനികരമായ എന്തൊക്കെ വസ്തുക്കൾ അതിൽ അടങ്ങിയിട്ടുണ്ട്‌ എന്നത്‌ കൂടി ഉൾപ്പെടുത്താനുള്ള നിയമവും കൊണ്ടു വരണം.

പാക്കറ്റ്‌ ഭക്ഷണ സാധനങ്ങളിലെ ചേരുവകൾ കോഡുകൾ ആക്കി എഴുതുന്നത്‌ നിരോധിക്കുക എന്നത്‌ വളരെ അത്യാവശ്യമായി ചെയ്യേണ്ട കാര്യമാണ്‌. വളരെ കുറച്ചു ആളുകൾക്ക്‌ മാത്രമേ ഇത്തരം കോഡുകളിൽ ഒളിപ്പിച്ചു വെച്ചിട്ടുള്ള മാരക വിഷ പദാർത്ഥങ്ങൾ ഏതൊക്കെയാണ്‌ എന്നതിനെ കുറിച്ച്‌ ധാരണയുള്ളൂ. ബാക്കി എല്ലാവരും ഇതൊക്കെ എന്തോ നല്ല സാധനങ്ങൾ ആണ്‌ എന്ന തെറ്റിദ്ധാരണയുമായി നടക്കുന്നവരാണ്‌.

ഇതൊക്കെയാണ്‌ ആരോഗ്യമന്ത്രിമാരും ഭരണ കർത്താക്കളും ചെയ്യേണ്ട അടിസ്ഥാനപരമായ കാര്യങ്ങൾ. അല്ലാതെ ഇതൊക്കെ കഴിച്ച്‌ രോഗികളായവരെ ചികിൽസിക്കാൻ ആശുപത്രി ഉണ്ടാക്കി കൂട്ടിയിട്ട്‌ കാര്യമില്ല.

അബസ്വരം :
ചികിൽസ നൽകേണ്ടത്‌ രോഗകാരണത്തിനാണ്‌. അല്ലാതെ രോഗലക്ഷണത്തിനല്ല.

                                                                     552
                                                                     *****
06.06.2015
സഖാവ്‌ ബോംബേ,
നിരപരാധികളെ രക്ഷിക്കാനായി ഗർഭാവസ്ഥയിൽ തന്നെ ആത്മഹത്യ ചെയ്ത്‌ വീര രക്തസാക്ഷിത്വം വരിച്ച നിനക്കഭിവാദ്യങ്ങൾ.

അബസ്വരം :
പൊട്ടട്ടങ്ങനെ പൊട്ടട്ടെ !
ഉണ്ടാക്കുമ്പൊ തന്നെ പൊട്ടട്ടെ !!


                                                                     553
                                                                     *****
09.06.2015
ഞാൻ മനസ്സിലാക്കിയിടത്തോളം അവയവ ദാനം ഇസ്ലാമികമായി ഹറാം ആവാതിരിക്കാൻ മൂന്ന്‌ മാനദണ്ഡങ്ങൾ ആണ്‌ പാലിക്കപ്പെടേണ്ടത്‌.

01. അവയവം സ്വീകരിക്കുന്ന വ്യക്തിക്ക്‌ അത്‌ അദ്ദേഹത്തിന്റെ ജീവൻ നില നിർത്താനോ, ശരീരത്തിന്റെ എതെങ്കിലും അവയവത്തിന്റെ പ്രവർത്തനം തടസ്സപ്പെടാതിരിക്കാനോ ആയിരിക്കണം അവയവം സ്വീകരിക്കുന്നത്‌.

02. അവയവം നൽകുന്ന വ്യക്തി പണത്തിനോ മറ്റോ ആയിട്ടാകരുത്‌ അവയവ ദാനം നടത്തുന്നത്‌.

03. അവയവ ദാനം നടത്തുന്ന വ്യക്തിയുടെ ജീവന്‌ ഭീഷണി ആവുന്ന തരത്തിൽ ഉള്ള അവയവങ്ങൾ ദാനം ചെയ്യാൻ പാടില്ല. ഉദാഹരണത്തിന്‌ രണ്ടു കിഡ്നികളിൽ ഒന്ന് ദാനം ചെയ്താൽ അതയാളുടെ ജീവനെ ബാധിക്കില്ല. എന്നാൽ ഒരാൾ അയാളുടെ ഹൃദയം ദാനം ചെയ്താൽ അതല്ലല്ലോ അവസ്ഥ.

ആദ്യത്തെ രണ്ട്‌ മാനദണ്ഡങ്ങൾ പാലിച്ചുകൊണ്ട്‌ മൃതശരീരത്തിൽ നിന്നും അവയവങ്ങൾ എടുക്കാം എന്നാണ്‌ ഞാൻ മനസ്സിലാക്കിയിട്ടുള്ളത്‌.

ഇതല്ലാതെ അവയവദാനം പാടില്ല എന്നും, അവയവദാനം നടത്തുന്നവരെ മോശമായി ചിത്രീകരിക്കണം എന്നും വല്ല കിത്താബിലും ഉണ്ടെങ്കിൽ അതൊന്ന് കാണിച്ചു തരുവാൻ അവയവ ദാനത്തെ മോശമാക്കി അവഹേളിക്കുന്ന ചിത്രീകരിക്കുന്ന അഭിനവ പണ്ഡിതരോട്‌ അഭ്യർത്ഥിക്കുന്നു.

അബസ്വരം :
ദാനവും ധർമ്മവും മഹത്തരമാണ്‌ എന്നും, ദാനധർമ്മങ്ങൾ ആപത്തുകളെ തടയും എന്നും പഠിപ്പിക്കുന്ന ഇസ്ലാമിൽ വിശ്വസിക്കുന്നവർക്ക്‌ എങ്ങിനെയാണ്‌ അവയവ ദാനവും രക്തദാനവും മോശമായി ചിത്രീകരിക്കാൻ കഴിയുക ? മൃതദേഹങ്ങളെ അവഹേളിക്കാൻ കഴിയുക ???

                                                                     554
                                                                     *****
10.06.2015
ആയുർവേദ കോളേജിലെ പഠന കാലത്ത്‌ കുറച്ച്‌ യോഗ ചെയ്യാനുള്ള യോഗം ഉണ്ടായിട്ടുണ്ട്‌.

യോഗ കുറച്ച്‌ ദിവസം ചെയ്തപ്പോൾ തന്നെ അതിലുള്ള താൽപര്യം ഇല്ലാതായി.

യോഗ ചെയ്താൽ പ്രമേഹം മാറും, കൊളസ്ട്രോൾ കുറയും എന്നൊക്കെ പറയുന്നത്‌ മണ്ടത്തരവും, ആവശ്യത്തിൽ അധികമുള്ള പുകഴ്ത്തലും ആയിട്ടാണ്‌ എനിക്ക്‌ തോന്നുന്നത്‌.

ഞങ്ങൾ യോഗാ ഹാളിലേക്ക്‌ പോകുമ്പോൾ മറ്റു ചില അധ്യാപകർ കളിയാക്കി ചോദിച്ചിരുന്നത്‌ "തല കുത്തി നിൽക്കാൻ പോവുകയാണല്ലേ?" എന്നായിരുന്നു !!

യോഗയിൽ നിന്ന് കിട്ടുന്ന ഗുണം ഒരു ലളിതമായ വ്യായാമത്തിൽ നിന്ന് ലഭിക്കുന്ന ഗുണങ്ങൾക്ക്‌ തുല്യമാണ്‌ എന്ന് വേണമെങ്കിൽ പറയാം. ദിവസം ശുദ്ധവായു ശ്വസിച്ച്‌ രണ്ടു കിലോമീറ്റർ നടക്കുന്നതിന്റെ നാലിലൊന്ന് ഗുണം പോലും യോഗയിൽ നിന്ന് ലഭിക്കുന്നില്ല എന്നതാണ്‌ അനുഭവം.

യോഗ ഇസ്ലാമികമായി ഹറാം ആണോ അല്ലയോ എന്ന് ചോദിച്ചാൽ, ഹറാം ആയതും അല്ലാത്തതുമായ യോഗാ മെത്തേഡുകൾ ഉണ്ട്‌ എന്ന് പറയേണ്ടി വരും.

ഇപ്പോൾ വിവാദമായിരിക്കുന്ന സൂര്യനമസ്ക്കാരം ഹറാം ആണ്‌ എന്ന് തന്നെ പറയാം. പടപ്പുകളെ നമസ്ക്കരിക്കുന്നത്‌ ഇസ്ലാമിൽ ഹറാം ആണ്‌. അതുകൊണ്ട്‌ തന്നെ ദൈവത്തിന്റെ സൃഷ്ടിയായ സൂര്യനെ നമസ്ക്കരിക്കുന്നത്‌ ഹറാം ആവുന്നു.
എന്നാൽ എല്ലാ യോഗ മെത്തേഡുകളിലും ഈ ഹറാം വരുന്നും ഇല്ല. ഉദാഹരണത്തിനു ശവാസനം. ഒരു ശവം പോലെ കണ്ണടച്ച്‌ മിണ്ടാതെ കിടന്നാൽ ശവാസനമായി. അങ്ങിനെ കിടക്കുന്നതിൽ ഇസ്ലാമികമായി തെറ്റൊന്നും ഇല്ലല്ലോ !!

ബി ജെ പി സർക്കാർ ആരോഗ്യം വർദ്ധിപ്പിക്കാൻ എന്ന പേരിൽ യോഗയുമായി വരുമ്പോൾ അതിന്റെ പിന്നിലെ ഗൂഢലക്ഷ്യങ്ങൾ മനസ്സിലാവാൻ കവടി നിരത്തേണ്ടതില്ല.

യോഗ എന്നത്‌ ഒരിക്കലും അടിച്ചേൽപ്പിക്കേണ്ട ഒരു സംഭവം അല്ല.
താൽപര്യം ഉള്ളവർ മാത്രം ചെയ്യട്ടെ.

അബസ്വരം :
ആരോഗ്യമാണ്‌ സർക്കാർ ലക്ഷ്യം വെക്കുന്നത്‌ എങ്കിൽ വിഷവും മായവുമില്ലാത ഭക്ഷണം ലഭ്യമാക്കാനും, ദിവസവും ഒന്നോ രണ്ടോ കിലോമീറ്റർ ശുദ്ധവായു ശ്വസിച്ച്‌ നടക്കാനുമുള്ള സൗകര്യവും നിയമവും ആണ്‌ ഉണ്ടാക്കേണ്ടത്‌.
അല്ലാതെ യോഗാസനം കൊണ്ട്‌ തോന്ന്യാസനം കളിക്കുകയല്ല വേണ്ടത്‌.

                                                                     555
                                                                     *****
11.06.2015
"ഇന്ത്യയെ ഹിന്ദു രാഷ്ട്രമായി പ്രഖ്യാപിക്കണം." - പ്രവീൺ തൊഗാഡിയ

അബസ്വരം :
സൂര്യനമസ്ക്കാരവും യോഗയും ഒക്കെ ചെയ്താലും പിരാന്തു മാറി ബുദ്ധി തെളിയില്ല എന്നതിനു ഇയാളേക്കാൾ വലിയ ഉദാഹരണം വേണോ ??

യോഗ ചെയ്ത്‌ വല്ലവനും ആരോഗ്യവും ബോധവും സംസ്ക്കാരവും ഒക്കെ ഉണ്ടാവുമെങ്കിൽ ഇയാളും യോഗ ചെയ്യാത്തവരോട്‌ കടലിൽ ചാടാൻ പറഞ്ഞവനുമൊക്കെ എന്നേ നന്നായിരുന്നു !!

                                                                     556
                                                                     *****
12.06.2015
കരിപ്പൂരിൽ വെടിവെപ്പിനെ തുടർന്നു അവിടത്തെ ജീവനക്കാർ തന്നെ റൺവേ ഉപരോധിച്ചതും, മറ്റു അക്രമങ്ങളും നാശനഷ്ടങ്ങളും ഉണ്ടാക്കി വിമാനങ്ങളെ ലാന്റ്‌ ചെയ്യാൻ അനുവദിക്കാതിരുന്നതുമായ കലാ പ രിപാടി ചെറ്റത്തരമാണ്‌.

വിമാനങ്ങൾക്ക്‌ നിലത്തിറങ്ങാൻ കഴിയാത്ത അവസ്ഥയുണ്ടാവുകയും വിമാനം ഇന്ധനം തീർന്ന് നിലത്ത്‌ പതിക്കുകയും ചെയ്താൽ ഉണ്ടാവുന്ന അവസ്ഥ ഒന്ന് ആലോചിച്ച്‌ നോക്കിക്കേ !!

ഈ ഉപരോധക്കാരുടെ പ്രിയപ്പെട്ട വല്ലവരും മുകളിൽ വട്ടമിട്ട്‌ പറക്കുന്ന വിമാനങ്ങളിൽ ഉണ്ടെങ്കിൽ അവർ ആ പണി ചെയ്യുമായിരുന്നോ ??

യാത്രക്കാരുടെ ജീവൻ കൊണ്ട്‌ കളിച്ച്‌ ഇവർക്കൊക്കെ ഒരു വിമാനത്താവളത്തിന്റേയും യാത്രക്കാരുടേയും സുരക്ഷയിൽ എത്രത്തോളം ആത്മാർത്ഥതയുണ്ടാവും ??

ഇത്തരം നാറികൾക്ക്‌ വെറും ഒരു താക്കീതോ, സ്ഥലം മാറ്റമോ ഒന്നുമല്ല ശിക്ഷയായി നൽകേണ്ടത്‌. ഒരു ആനുകൂല്യമോ, ദയാദാക്ഷിണ്യമോ നൽകാതെ അവരെ ജോലിയിൽ നിന്ന് പിരിച്ച്‌ വിടണം. സർക്കാർ ശമ്പളം പറ്റുന്ന ഒരു ജോലിയും അവർക്ക്‌ ഇനി ലഭിക്കുന്ന സാഹചര്യം ഉണ്ടാവരുത്‌. എങ്കിലേ ലാന്റിംഗ്‌ തടസ്സപ്പെട്ട വിമാനത്തിലിരുന്നു തീ തിന്നവർക്ക്‌ നീതി ലഭിക്കൂ. ഇനി ഒരു ഉദ്യോഗസ്ഥനും ഈ പണി ചെയ്യാൻ തോന്നാതിരിക്കൂ.

അബസ്വരം :
ശിക്ഷകൾ ശിക്ഷകൾ തന്നെ ആവണം.
അല്ലാതെ തലോടലുകളോ, ആളുകളുടെ കണ്ണിൽ പൊടിയിടാനുള്ള നാടകമോ ആവരുത്‌.

                                                                     557
                                                                     *****
14.06.2015
മാണിയെ വിശുദ്ധനായി പ്രഖ്യാപിച്ച സ്ഥിതിക്ക് ഇനി മാഗിയേയും വൈകാതെ വിശുദ്ധയായി പ്രഖ്യാപിക്കും.

എന്നിട്ട് മാണിയെ പിടിച്ച് അഴിമതി വിരുദ്ധ പരസ്യത്തിന്റേയും, മാഗിയെ പിടിച്ച് വിഷാംശരഹിത ഭക്ഷണ പരസ്യത്തിന്റേയും ബ്രാന്‍ഡ് അംബാസിഡര്‍മാരായി നിയമിക്കണം.

അബസ്വരം :
മാണിയായാലും മാഗിയായാലും മണി ഉണ്ടെങ്കില്‍ പുണ്യാളന്‍ !


                                                                     558
                                                                     *****
15.06.2015
ലളിത്‌ മോഡിയെ സുഷമത്താത്ത വഴിവിട്ട്‌ സഹായിച്ചത്‌ മാനുഷിക പരിഗണനയുടെ പേരിലാണത്രേ !!

മദനി ജയിലിൽ കിടന്നപ്പോഴും, ഗുജറാത്തിൽ കൂട്ടക്കൊല നടന്നപ്പോഴും, ഇപ്പോഴും സ്വന്തം രാജ്യത്ത്‌ ഒരുപാട്‌ നിരപരാധികൾ ജയിലിൽ കഴിയുമ്പോഴും അവരോടൊന്നും തോന്നാത്ത മാനുഷികതയും പരിഗണനയും നാല്‌ മുക്കാലുള്ള ലളിത മോഡിയുടെ വിഷയം വന്നപ്പോൾ എങ്ങനെ പൊട്ടിമുളച്ചു വന്നു ആവോ ??

ആരോടും പ്രത്യേക മമതയോ വിദ്വേഷമോ കൂടാതെ നാട്‌ ഭരിക്കും എന്നൊക്കെ സത്യം ചെയ്തല്ലേ സുഷമാത്തയും മന്ത്രിണിയായത്‌ ??

അബസ്വരം :
മാനുഷിക പരിഗണന എന്ന സാധനം ഇത്താത്താന്റെ കജ്ജിൽ ഇനിയും ഉണ്ടെങ്കിൽ അതിൽ നിന്ന്‌ ഇത്തിരി മ്മടെ ബഡാ മോഡി കെട്ടി കെട്ടിയോളാക്കിയ ശേഷം തിരിഞ്ഞു നോക്കാതെ ജീവിതം നശിച്ച യശോധ ചേച്ചിക്ക്‌ നൽകണം എന്ന് വിനീത കൂശ്മാണ്ടക ദൃഷ്ടദ്രുമനായി അഭ്യർത്ഥിക്കുന്നു.

                                                                     559
                                                                     *****
16.06.2015
"ഖുർആനിൽ അല്ലാഹ്‌ എന്ന വാക്കിനു ശേഷം എറ്റവും കൂടുതൽ തവണ ആവർത്തിക്കപ്പെട്ട വാക്ക്‌ ഇൽമ്‌. ഇസ്ലാം അറിവിന്‌ പ്രാധാന്യം നൽകുന്ന മതം." - ജനാബ്‌. നരേന്ദ്ര മോഡി സാഹിബ്‌.

ഖുർആനിലെ ഒരോ വാക്കിന്റേയും എണ്ണം എണ്ണി കണക്കാൻ സമയം ചിലവൊഴിക്കുന്നതിനു മുൻപ്‌ അതിന്റെ അന്ത:സത്തയും മൂല്യങ്ങളും കൃത്യമായി മനസ്സിലാക്കിയിരുന്നു എങ്കിൽ എത്ര നന്നായിരുന്നു.

എങ്കിൽ ഒരുപാട്‌ പേരുടെ ചോരക്കറ നിങ്ങളുടെ കൈകളിൽ പതിയാതെ നോക്കാമായിരുന്നില്ലേ ?

അബസ്വരം :
കാരണം ഒരു നിരപരാധിയെ കൊന്നവൻ ലോകത്തെ മുഴുവൻ ജനങ്ങളേയും കൊന്നവന്ന് തുല്യമാണ്‌ എന്നതും ഇസ്ലാമിന്റേയും വിശുദ്ധ ഖുർആനിന്റേയും അധ്യാപനമാണ്‌.
ഇസ്ലാമിൽ നിന്നും നിങ്ങൾ പഠിക്കാതെ വിട്ടു പോയ അറിവാണ്‌ അത്‌.


                                                                     560
                                                                     *****
16.06.2015
മോഡി വീണ്ടും ശശി !!

ഖുര്‍ആനില്‍ ഏറ്റവും ആവര്‍ത്തിച്ച വാക്ക് അല്ലാഹ് എന്നാണെങ്കിലും രണ്ടാമത് വരുന്ന പദം മോദി പറഞ്ഞത് പോലെ ഇല്‍മ് എന്നല്ല. 'അല്ലാഹ്' എന്ന പദം 2697 തവണയാണ് ഖുര്‍ആനില്‍ പരാമര്‍ശിക്കുന്നത്. ഖാല(പറഞ്ഞു) എന്ന വാക്ക് 1618 തവണയാണ് ആവര്‍ത്തിക്കുന്നുണ്ട്. കാന (ആയിരുന്നു) എന്ന പദം 1358 തവണയും വിശ്വാസം എന്നര്‍ത്ഥം വരുന്ന ഈമാന്‍ എന്ന വാക്ക് 811 തവണയും വരുന്നു. പ്രധാനമന്ത്രിയുടെ വാക്കുകളിലെ മറ്റൊരു അബദ്ധം ഇല്‍മ് എന്ന പദം 800 തവണ ആവര്‍ത്തിക്കുന്നുണ്ട് എന്നാണ്. എന്നാല്‍ ഇല്‍മ് എന്ന പദം 779 തവണയാണ് വരുന്നത്.
ഖുര്‍ആനില്‍ കൂടുതല്‍ ആവര്‍ത്തിക്കുന്ന മറ്റു വാക്കുകള്‍ :
ആമന - വിശ്വസിക്കുക - 537
അലിമ - അറിഞ്ഞു - 382
ജഅല - 340
കഫറ - 289
ജാഅ - 278

അബസ്വരം :
കഴിയില്ല മക്കളേ കഴിയില്ല !! ഇങ്ങക്ക് മോഡിയുടെ ബഡായിയെ തോല്‍പ്പിക്കാന്‍ കഴിയില്ല !!

കടപ്പാട് : വിവിധ ഇസ്ലാമിക്ക് സൈറ്റുകള്‍

                                                                     561
                                                                     *****
17.06.2015
ഖുര്‍ആനില്‍ ഏറ്റവും കൂടുതല്‍ ആവര്‍ത്തിക്കപ്പെട്ട രണ്ടാമത്തെ വാക്ക് "ഇല്‍മ്" എന്നതാണ് എന്ന് മോഡി പറഞ്ഞതിലെ തെറ്റ് ചൂണ്ടി കാണിക്കുമ്പോള്‍ ചിലര്‍ മുന്നോട്ട് വെക്കുന്ന വാദം രസകരമാണ്.

"മോഡി അതൊക്കെ തെറ്റിച്ച് പറഞ്ഞത് കാര്യമാക്കണോ ? മൂപ്പര്‍ ഖുര്‍ആന്‍ വായിക്കുന്നു പഠിക്കുന്നു എന്നതൊക്കെ നല്ല കാര്യമല്ലേ ? അത് കണക്കിലെടുക്കുമ്പോള്‍ എന്തിന് ഈ തെറ്റൊക്കെ നോക്കുന്നു. ഇതൊക്കെ അത്ര കൂലങ്കഷമായി നോക്കേണ്ട കാര്യമാണോ ?" - എന്നതൊക്കെയാണ് അവരുടെ വാദങ്ങള്‍.

എന്നാല്‍ ഇവര്‍ മനസ്സിലാക്കേണ്ട അടിസ്ഥാനപരമായ ഒരു കാര്യമുണ്ട്.
വിദ്യക്ക് ഇസ്ലാം നല്‍കിയ പ്രാധാന്യം പറയേണ്ടത് നുണ പ്രചരിപ്പിച്ചോ വസ്തുതാപരമല്ലാത്ത കാര്യങ്ങള്‍ പറഞ്ഞോ അല്ല.

ഇക്കണക്കിന് പോയാല്‍ ഇസ്ലാം കാര്യം പത്താണ് എന്നും ഈമാന്‍ കാര്യം ഇരുപതാണ് എന്നും, റംസാന്‍ മാസത്തില്‍ പത്ത് നോമ്പുകള്‍ ആണ് ഉള്ളത് എന്നും മോഡി പറഞ്ഞാല്‍ അതൊന്നും ഇഴകീറി പരിശോധിക്കേണ്ടതല്ല, മോഡി അതിന്റെ പ്രാധാന്യം പറയാന്‍ വേണ്ടി പറഞ്ഞതാണ് എന്ന് പറയേണ്ടി വരില്ലേ ??

മോഡി യഥാര്‍ത്ഥത്തില്‍ ഇത്തരം പ്രസ്താവന നടത്തിയത് തന്നെ മുസ്ലിംങ്ങളെ ഒന്ന് സുഖിപ്പിക്കാനും, തനിക്ക് ഖുര്‍ആന്‍ ഒക്കെ നന്നായി അറിയാം എന്ന് പ്രജകളെ ഒന്ന് അറിയിക്കാനും ആണ്. ആ പ്രസ്താവന തന്നെ തെറ്റായി മാറുമ്പോള്‍, താന്‍ പറയുന്നത് ശരിയാണോ തെറ്റാണോ എന്ന് ഉറപ്പ് വരുത്താതെ ബഡായി അടിക്കാനുള്ള മോഡിയുടെ തൊലിക്കട്ടിയാണ് വെളിവാക്കപ്പെടുന്നത്.

തെറ്റ് ആര് പറഞ്ഞാലും തെറ്റാണ്. മോഡി തെറ്റ് പറഞ്ഞാല്‍ ഇഴകീറി പരിശോധിക്കരുത്, അതിനെ ചോദ്യം ചെയ്യരുത് എന്നതല്ലല്ലോ ഇസ്ലാമിക കാഴ്ചപ്പാട്.

അബസ്വരം :
ശരിയായ വിദ്യക്കും അറിവിനും ആണ് ഇസ്ലാം പ്രധാന്യം നല്‍കുന്നത്. അല്ലാതെ തെറ്റുകള്‍ പ്രചരിപ്പിക്കുന്നതിനല്ല.
                                                                     562
                                                                     *****
17.06.2015
വിശുദ്ധ ഖുർആൻ മാനവർക്കായി അവതരിക്കപ്പെട്ട റംസാൻ മാസം ഒരിക്കൽ കൂടി നമ്മിലേക്കെത്തുന്നു.

ഈ റംസാനിൽ നാഥന്റെ അനുഗ്രഹം നേടാൻ നമുക്കേവർക്കും കഴിയട്ടെ എന്ന പ്രാർത്ഥനയോടെ...

അബസ്വരം :
എല്ലാ പ്രിയർക്കും റംസാൻ ആശംസകൾ.


                                                                     563
                                                                     *****

19.06.2015
ലോഭരഹിതനും ഗുണവാനുമായ ഒരു സാക്ഷിയായാലും മതി. എന്നാൽ ശുദ്ധകളാണെങ്കിൽ പോലും സ്ത്രീകളെ ഋണാദാനാദി വ്യവഹാരങ്ങളിൽ സാക്ഷികളായി സ്വീകരിക്കരുത്‌. സ്ത്രീകൾ അസ്ഥിര ബുദ്ധികളായതാണ്‌ കാരണം.
(മനുസ്മൃതി അദ്ധ്യായം ഏട്ട്‌. ശ്ലോകം - 77)

പിന്നെ തങ്ങളുടെ പുരുഷന്മാരിൽ നിന്ന്‌ രണ്ടു പേരെ അതിനു സാക്ഷികളാക്കുകയും ചെയ്യുക. രണ്ടു പുരുഷന്മാരില്ലെങ്കിൽ ഒരു പുരുഷനും രണ്ടു സ്ത്രീകളുമായിക്കൊള്ളട്ടെ. ഒരുവൾ മറന്നു പോവുകയാണെങ്കിൽ മറ്റവൾ ഓർമ്മിപ്പിക്കുവാനാണത്‌.
(വിശുദ്ധ ഖുർആൻ. അൽ ബഖറ - 282)

അബസ്വരം :
വായിക്കുക. പഠിക്കുക. മനസ്സിലാക്കുക !
ഏവർക്കും വായനദിനാശംസകൾ !!

                                                                     564
                                                                     *****
20.06.2015
നിലവിളക്ക്‌ കൊളുത്തിയാലേ ഉത്ഘാടനം ആവൂ എന്ന വല്ല നിയമവും ഉണ്ടോ ?

ഒരാൾക്ക്‌ താൻ നിലവിളക്ക്‌ കൊളുത്തണോ വേണ്ടയോ എന്ന് തീരുമാനിക്കാനുള്ള പൂർണ്ണമായ വ്യക്തി സ്വാതന്ത്ര്യം ഉണ്ട്‌. അയാൾക്ക്‌ ഇഷ്ടം ഉണ്ടെങ്കിൽ അയാൾ നിലവിളക്ക്‌ കൊളുത്തട്ടെ. ഇഷ്ടമില്ലെങ്കിൽ നിലവിളക്ക്‌ കൊളുത്താതിരിക്കട്ടെ.

നിലവിളക്ക്‌ കൊളുത്താത്ത ആളെ വല്ലവരും വർഗ്ഗീയ വാദി എന്ന് വിളിക്കുന്നുണ്ട്‌ എങ്കിൽ ആ വിളി നടത്തുന്നവരാണ്‌ യഥാർത്ഥ വർഗ്ഗീയ വാദികൾ. "നിലവിളക്ക്‌ കൊളുത്തുന്നതാണ്‌ മതേതരത്തിന്റെ ലക്ഷണം" എന്നത്‌ ഭരണ ഘടനയിൽ പറഞ്ഞ കാര്യമൊന്നും അല്ലല്ലോ.

മാത്രമല്ല "നിലവിളക്ക്‌ കൊളുത്തിയേ തീരൂ" എന്ന് പറയുന്നവർ ഒരു വ്യക്തിയുടെ വ്യക്തി സ്വാതന്ത്രത്തിലേക്ക്‌ കടന്നു കയറുകയാണ്‌ ചെയ്യുന്നത്‌.

നിലവിളക്ക്‌ കൊളുത്തൽ ഔദ്യോഗിക ഉത്ഘാടന കർമ്മ രീതിയായി സർക്കാരോ ഭരണഘടനയോ അംഗീകരിച്ചിട്ടും ഇല്ല.

"ഞാൻ നിലവിളക്ക്‌ കൊളുത്തുകയും ഇല്ല മറ്റാരും കൊളുത്താനും പാടില്ല" എന്ന നയമാണ്‌ ഒരാൾ സ്വീകരിക്കുന്നത്‌ എങ്കിൽ അയാളെ വർഗ്ഗീയ വാദി എന്ന് വിളിക്കാം.

എന്നാൽ "ഞാൻ നിലവിളക്ക്‌ കൊളുത്തില്ല, മറ്റുള്ളവർ കൊളുത്തിയാലും ഇല്ലെങ്കിലും അതിൽ എനിക്കൊന്നുമില്ല, കൊളുത്തുന്നവർ കൊളുത്തട്ടെ" എന്ന നിലപാടാണ്‌ ഒരാൾ സ്വീകരിക്കുന്നത്‌ എങ്കിൽ അയാളെ വർഗ്ഗീയ വാദി എന്ന് വിളിക്കുന്നതിൽ എന്തർത്ഥം ??

അബസ്വരം :
സ്വന്തം വിശ്വാസങ്ങൾ താൻ പാലിക്കുന്നതല്ല വർഗ്ഗീയത. അത്‌ അന്യരിലേക്ക്‌ അടിച്ചേൽപ്പിച്ച്‌ അവരെക്കൊണ്ട്‌ പാലിപ്പിക്കാൻ ശ്രമിക്കുന്നതാണ്‌ വർഗ്ഗീയതയും അസഹിഷ്ണുതയും.

                                                                     565
                                                                     *****
22.06.2015
നിലവിളക്ക്‌ കത്തിക്കാത്തത്‌ മതേതര വിരുദ്ധമാണ്‌ എന്ന്‌ പറയുന്നവരോട്‌ ചില ചോദ്യങ്ങൾ.

എന്റെ ചോദ്യങ്ങൾ എസ്‌ ഓർ നോ ഉത്തരങ്ങൾ ലഭിക്കേണ്ട രീതിയിലുള്ള ചോദ്യങ്ങളാണ്‌. അതുകൊണ്ട്‌ ആ രീതിയിൽ ഉത്തരം നൽകുക. പ്രസ്താവനകൾ അല്ല ആവശ്യം.

01. നിലവിളക്ക്‌ കൊളുത്താൻ തയ്യാറുള്ളവർ മാത്രമേ മന്ത്രിയോ എം എൽ എയോ ആകാവൂ എന്ന് ഭരണഘടനയിൽ ഉണ്ടോ ?

02. ഇന്ത്യയുടേയോ കേരളത്തിന്റേയോ ഔദ്യോഗിക ഉത്ഘാടന രീതി നിലവിളക്ക്‌ കത്തിക്കലാണ്‌ എന്ന് നിയമ വ്യവസ്ഥയിൽ ഉണ്ടോ ?

03. സത്യപ്രതിജ്ഞ്യയിൽ "നിലവിളക്ക്‌ കത്തിക്കും" എന്നോ "കത്തിക്കണം" എന്നോ ഉണ്ടോ ?

04. "നിലവിളക്ക്‌ കത്തിക്കലാണ്‌ മതേതരത്വം" എന്ന്‌‌ ഭരണഘടനയിൽ പറയുന്നുണ്ടോ ?

05.നിലവിളക്ക്‌ കത്തിക്കാത്തവർ മതേതര വിരുദ്ധരാണ്‌ എന്ന് നിയമ വ്യവസ്ഥയിൽ ഉണ്ടോ ?

06.നിലവിളക്ക് കത്തിക്കാത്തവര്‍ ഉത്ഘാടനത്തിലും മറ്റും പങ്കെടുക്കാന്‍ പാടില്ല എന്ന് നിയമം ഉണ്ടോ ??

അബസ്വരം :
അറിയാനുള്ള പൂതികൊണ്ടാണ്‌ മക്കളേ !

                                                                     566
                                                                     *****
22.06.2015
മല്ലികാ ഷറാവത്ത്‌ ത്രിവർണ്ണമുള്ള വസ്ത്രം കൊണ്ട്‌ നഗ്നത മറച്ചാൽ ദേശീയ പതാകാ അപമാനിക്കലും, നരേന്ദ്ര ദാമോദർ ദാസ്‌ മോഡി അതേ ത്രിവർണ്ണ തുണിയിൽ മൂക്ക്‌ ചീറ്റി, വിയർപ്പ്‌ തുടച്ചാൽ ദേശീയ പതാകാ ബഹുമാനിക്കലും ആകുന്ന കലയെയാണ്‌ "സംഘീസ്‌ തിയറി ഓഫ്‌ രാഷ്യസ്നേഹം" എന്ന് പറയുന്നത്‌.

അബസ്വരം :
ബ്ലോഗർക്ക്‌ അടുപ്പിലും ലിങ്കിടാം എന്നാണല്ലോ പ്രമാണം !

                                                                     567
                                                                     *****
23.06.2015
വിജയം നേടാൻ അർഹനായ ഒരു സ്ഥാനാര്‍ത്ഥിയും അരുവിക്കരയിൽ ഇല്ല എന്നതാണ്‌ വാസ്തവം.

ശബരിനാഥ്‌ ജയിച്ചാൽ ഇതുവരെയുള്ള യു ഡി എഫിന്റെ അഴിമതിക്കറകൾ എല്ലാം അതിൽ അലിയിപ്പിച്ചു കളയും. കൂടാതെ പിതാവ്‌ മരിച്ച സഹതാപം എന്നത്‌ ഒരു തിരഞ്ഞെടുപ്പിൽ ജയിക്കാനുള്ള ഘടകം ആയാൽ അത്‌ സമൂഹത്തിനു നൽകുക തെറ്റായ സന്ദേശമാണ്‌.

വിജയകുമാറും വിജയത്തിനു അർഹനല്ല. പല ആരോപണങ്ങളും ഉയർന്നു കഴിഞ്ഞു. നിയമസഭ തല്ലി തകർക്കുന്ന പാർട്ടിക്കാരെയല്ല നിയമസഭയിലേക്ക്‌ അയക്കേണ്ടത്‌. മാത്രമല്ല ബംഗാളിൽ കോൺഗ്രസ്സുമായി കൂട്ടുകൂടാം എന്നു സി പി എം പറയുമ്പോൾ അത്‌ അവരുടെ രാഷ്ട്രീയ പാപ്പരത്തവും അടവു നയവും വ്യക്തമാക്കുന്നു.
പിന്നെ രാജഗോപാൽ. വർഗ്ഗീയ അജണ്ടയുമായി നടക്കുന്ന ബി ജെ പിയുടെ രാജഗോപാൽ ജയിച്ചാൽ അത്‌ മോഡിയുടെ കോപ്രായങ്ങൾക്കും, മൂപ്പർ രാജ്യത്തെ തീറെഴുതി നൽകിയ അദാനിക്കും ഉള്ള അംഗീകാരമായി വ്യാഖ്യാനിക്കപ്പെടും. അതുകൊണ്ട്‌ മൂപ്പരും അർഹിക്കുന്നത്‌ പരാജയം തന്നെയാണ്‌.

ബാക്കി ഉള്ളത്‌ വിജയ സാധ്യത ഒട്ടുമില്ലാത്ത ചെറു കഷ്ണം കഷ്ണം പാർട്ടികൾ.

ഇവരിൽ നിന്ന് അർഹനായ ഒരാളെ കണ്ടെത്തി വിജയപ്പിക്കുക എന്ന ഉത്തരവാദിത്വം നിലനിൽക്കുന്ന അരുവിക്കരയിലെ ജനങ്ങളാണ്‌, സ്ഥാനാർത്ഥികളേക്കാളും വലിയ പരീക്ഷണം നേരിടുന്നത്‌.

അബസ്വരം :
നമ്മുടെ രാഷ്ട്രീയ സംസ്ക്കാരം അപചയിച്ച്‌ അപചയിച്ച്‌ എത്തിയ ഒരു അവസ്ഥയേ!

                                                                     568
                                                                     *****
24.06.2015
എസ്‌ എസ്‌ എൽ സിക്കും, പ്ലസ്‌ ടു വിനും മാർക്ക്‌ വാരിക്കോരി കൊടുക്കുന്നുണ്ട്‌ എന്ന് പറഞ്ഞപ്പോ പലരും അതിനെ എതിർത്തു. പഠന നിലവാരം ഉയർന്നത്‌ കൊണ്ട്‌ മാർക്ക്‌ കൂടിയതാണ്‌ എന്നൊക്കെ വെച്ച്‌ കീറി.

എന്നിട്ടിപ്പൊ എന്തായി ? പ്ലസ്‌ ടു വിനു എല്ലാ വിഷയത്തിലും എ പ്ലസ്‌ കിട്ടിയ അമൃത - "വിദേശ രാജ്യങ്ങളായ ചെന്നൈയും, മുംബൈയും" എന്നൊക്കെ പറയുമ്പോഴെങ്കിലും ഇങ്ങൾക്കാർക്കും വാരിക്കോരി കൊടുത്ത മാർക്കിൽപ്പെട്ടതാണ്‌ ഇതെന്ന് തിരിച്ചറിയാൻ കഴിയുന്നില്ലേ മക്കളേ ??

അബസ്വരം :
ഓൾടെ പേപ്പർ നോക്കിയവരെ കണ്ടിരുന്നെങ്കിൽ ഒരു കുന്തശ്രീ അവാർഡ്‌ നൽകാമായിരുന്നു.


                                                                     569
                                                                     *****
25.06.2015
ചില തംസയങ്ങൾ !!

നോമ്പില്ലാത്തവരെ വിളിച്ച്‌ മഗ്‌രിബിനു ഭക്ഷണം കൊടുത്താൽ നോമ്പ്‌ തുറ ആകുമോ ??

നോമ്പ്‌ ഉള്ളവരേയും ഇല്ലാത്തവരേയും വിളിച്ച്‌ സമൂഹ നോമ്പ്‌ തുറ എന്ന പേരിൽ നടത്തപ്പെടുന്ന പരിപാടി യഥാര്‍ത്ഥത്തിൽ "നോമ്പ്‌ തുറ" എന്ന കർമ്മത്തെ അവഹേളിക്കുന്ന ഒരു പരിപാടിയല്ലേ ??

ഇത്തരം പരിപാടികളെല്ലാം ഒരു കണ്ണടച്ച്‌ ഇരുട്ടാക്കിയിട്ടുള്ള സുഖിപ്പിക്കലല്ലേ ?

'സമൂഹ നോമ്പ്‌ തുറ' എന്നതിനു പകരം 'സമൂഹ ഭക്ഷണം കഴിക്കൽ' എന്ന പേരല്ലേ ഈ പരിപാടിക്ക്‌ ചേരുക ?

അബസ്വരം :
നോമ്പില്ലാത്തവൻ മഗ്‌രിബ്‌ ബാങ്ക്‌ കേട്ട ശേഷം ഭക്ഷണം കഴിച്ചാൽ അത്‌ നോമ്പ്‌ തുറക്കൽ ആവുമോ ?

                                                                     570
                                                                     *****
26.06.2015
അരുവിക്കരയിൽ ജയിക്കാൻ അർഹനായ ഏക സ്ഥാനാർത്ഥിയേ ഉള്ളൂ. ആ സ്ഥാനാർത്തിയുടെ പേര്‌ - NOTA.

മക്കൾ രാഷ്ടീയം, അഴിമതി, കൊലപാതകം, അവസരവാദം, വർഗ്ഗീയം, ഫോട്ടോഷോപ്പ്‌ വികസനം - പോയി തുലയട്ടെ എല്ലാം.

അബസ്വരം :
യോജിച്ച സ്ഥാനാർത്ഥി ഇല്ലെങ്കിൽ 'തമ്മിൽ ഭേദമുള്ള തൊമ്മനെ' വിജയിപ്പിക്കുന്നതല്ല ജനാധിപത്യം. കൊള്ളുന്ന ഒരുത്തനുമില്ല എന്ന് വിളിച്ചുപറയുന്നതും, അതിനനുസരിച്ച്‌ വോട്ട്‌ ചെയ്യുന്നതുമാണ്‌ ജനാധിപത്യം.

                                                                     571
                                                                     *****
28.06.2015
വിളിക്കാതെ ചെന്ന സുരേഷ്‌ ഗോപിയും, ഇറക്കി വിട്ട സുകുമാരൻ നായരും ഒരു പോലെ തങ്ങളുടെ സംസ്ക്കാരം പ്രകടിപ്പിച്ചു.

സുരേഷ്‌ ഗോപിയോടുള്ള കലിപ്പ്‌ തീർക്കാനായി സുകുമാരൻ നായരെ ചിലർ പൊക്കി അടിക്കുന്നതിന്റെ ഗുട്ടൻസ്‌ മനസ്സിലായില്ല.

അബസ്വരം :
"ഇരിക്കേണ്ടിടത്ത്‌ ഇരുന്നാൽ മാറി ഇരിക്കേണ്ട" - എന്ന ചൊല്ല് സുരേഷ്‌ ഗോപിക്കും, "അകമഴക്‌ മുഖത്തറിയാം" എന്ന ചൊല്ല് സുകുമാരൻ നായർക്കും വെടിക്കേറ്റ്‌ ചെയ്യുന്നു!

                                                                     572
                                                                     *****
30.06.2015
പാരമ്പര്യം കാത്ത്‌ സൂക്ഷിച്ച്‌ ഗിന്നസ്‌ ബുക്കിലേക്ക്‌ ഒരു പടി കൂടി അടുത്ത പൂജ്യം കുത്ത്‌ രാജഗോപാലിനു അഭിനന്ദനങ്ങൾ.

ജയിക്കുമെന്ന്‌ മുക്രയിട്ടു നടന്നിരുന്ന മാർക്കികളോട്‌ - ഡിങ്കിലാബ്‌ കുന്താബാദ്‌.

അബസ്വരം :
പിണറായി അച്ചൂസ്‌ പോരിന്നിടയിൽ ചെങ്കൊടിയിൽ നിന്ന് കാവിക്കൊടിയിലേക്ക്‌ ഒഴുക്ക്‌ തുടരുന്നു.

                                                                     573
                                                                     *****
01.07.2015
പടച്ചോനെ മ്മടെ രോഗ്യോളെ കാത്തോളണേ...!!

മ്മടെ രോഗ്യോള്‍ടെ അസുഖം മാറ്റി അവര്‍ക്ക് ആരോഗ്യവും ദീര്‍ഘായുസ്സും നല്‍കേണമേ...!!

അബസ്വരം :
ഇന്നാണത്രേ ഡോക്ടേഴ്സ് ഡേ !


                                                                     574
                                                                     *****
03.07.2015
അരുവിക്കരയിലെ വോട്ടർമാരെ മുഴുവൻ ബുദ്ധിശൂന്യന്മാരാക്കിയും മറ്റും അവഹേളിക്കുന്ന തരത്തിൽ മാർക്കികൾ സോഷ്യൽ മീഡിയകളിൽ നടത്തുന്ന പ്രചാരണം അപലപനീയമാണ്‌.

അരുവിക്കര - എന്ന പേര്‌ ഉപയോഗിച്ച്‌ ഇത്തരം പ്രചാരണങ്ങൾ നടത്തുമ്പോൾ തങ്ങൾക്ക്‌ വോട്ട്‌ ചെയ്തവർ കൂടി അക്കൂട്ടത്തിൽ ഉൾപ്പെടും എന്ന് ചിന്തിക്കാനുള്ള സാമാന്യ ബുദ്ധി പോലും മാർക്കികൾക്ക്‌ ഇല്ലേ ?

മലപ്പുറത്തും പാർട്ടി കോഞ്ഞാട്ട ആയപ്പോൾ "മലപ്പുറത്തെ കുട്ടികൾ കോപ്പി അടിച്ചാണ്‌ പാസാവുന്നത്‌" എന്നാണ്‌ വേലിക്കകത്ത്‌ നിന്ന് ഒരുത്തൻ അച്ചുതാനന്ദിച്ചത്‌.
തങ്ങൾക്ക്‌ വോട്ട്‌ തരാത്തവരെല്ലാം വിവരവും വിവേകവും ഇല്ലാത്തവരാണ്‌ വല്ല പാർട്ടികളും വിശ്വസിക്കുകയും പ്രഖ്യാപിക്കുകയും ചെയ്യുന്നുണ്ട്‌ എങ്കിൽ ആ പാർട്ടിക്കാർ തന്നെയാണ്‌ വിവരവും വിവേകവും ഇല്ലാത്തവരെന്ന്‌ നിസ്സംശയം വിശ്വസിക്കേണ്ടി വരും.

അബസ്വരം :
അഴിമതിയേക്കാൾ ജനങ്ങൾ വെറുക്കുന്നത്‌ അഹന്തയേയും, വിടുവായത്തത്തേയും, മറ്റവന്മാർ കൊണ്ടുവന്നപ്പോൾ സമരം നടത്തി കോഞ്ഞാട്ട ആക്കിയ പദ്ധതികൾ മ്മൾ അധികാരത്തിൽ വരുമ്പോൾ പേര്‌ മാറ്റി നടപ്പാക്കുന്ന ഇരട്ടത്താപ്പിനേയും ആണ്‌ എന്നെങ്കിലും അരുവിക്കരയിൽ നിന്ന് പഠിച്ചിട്ടില്ലെങ്കിൽ ഈ പരാജയത്തിൽ നിന്നും മാർക്കികൾ പഠിക്കേണ്ട യഥാർത്ഥ പാഠം പഠിച്ചിട്ടില്ല.

                                                                     575
                                                                     *****
04.07.2015
പശുവിനെ കൊല്ലുന്നത്‌ ബലാൽസംഗം ആണെങ്കിൽ ഷെഡ്ഡി ഇടാത്ത പശുവിനെ നോക്കുന്നത്‌ ഏതു വകുപ്പിൽ പെടും ?

അബസ്വരം :
ഐ പി സി എന്നതിന്റെ പൂർണ്ണ രൂപം "ഇന്ത്യൻ പശു കോഡ്‌" എന്നാക്കുമോ ഇവറ്റകൾ ?

                                                                     576
                                                                     *****
06.07.2015
പഠിക്കാന്‍ പാഠപുസ്തകം ഇല്ലെങ്കിലെന്താ കോയാ, അനക്ക് എ പ്ലസ് കിട്ടിയാല്‍ പോരേ ?

പാഠപുസ്തകം തന്നില്ലെങ്കിലും എ പ്ലസ് മന്ത്രി തരും. സോ ഡോണ്ട് വറി കുട്ട്യോളേ !!

അബസ്വരം :
പാഠപുസ്തകം ഇല്ലാതെ എല്ലാവരും പാസാവുന്ന ഒരു വിദ്യാഭ്യാസ സമ്പ്രദായം. അതായിരുന്നു മൂപ്പര്‍ കണ്ട സ്വപ്നം !


                                                                     577
                                                                     *****
10.07.2015
അതല്ലെങ്കിലും അങ്ങിനെ തന്നെ ആണല്ലോ !
കൊലയാളി മാപ്പിള ആണെങ്കിൽ സംഭവം തീവ്രവാദവും ഇസ്ലാമിക ഭീകരതയും. മറ്റു വല്ലവരും ആണ്‌ കൊലയാളി എങ്കിൽ പ്രതി മാനസിക രോഗിയും അന്തം കമ്മിയും.

ആ പിഞ്ചു കുഞ്ഞിനെ കൊന്നവനെ കഴുമരത്തിലേറ്റാനുള്ള ത്രാണിയുണ്ടോ ഇന്ത്യൻ നിയമവ്യവസ്ഥേ നിനക്ക്‌ ?

അബസ്വരം :
കൊല്ലപ്പെട്ട ഫഹദിനേയും ഞങ്ങളേയും സ്വർഗ്ഗത്തിൽ ഒരുമിപ്പിച്ച്‌ കൂട്ടണേ നാഥാ....


                                                                     578
                                                                     *****
14.07.2015
കേരളത്തിലെ മുസ്ലിം സമൂഹത്തിനു അപമാനം സമ്മാനിച്ച കൈവെട്ടിസ്റ്റുകൾ പിരിവ്‌ ബക്കറ്റുമായി റംസാനിൽ ഇറങ്ങിയിട്ടുണ്ട്‌. അത്തരക്കാർക്ക്‌ നൽകുന്ന സംഭാവനകൾ നാം അറിയാതെ അക്രമത്തിനുള്ള പ്രോൽസാഹനവും പിന്തുണയും ആയി മാറുകയാണ്‌ ചെയ്യുന്നത്‌ എന്ന് ഓർക്കുമല്ലോ.

പിരിവിനായി സമീപിക്കുമ്പോൾ "നിങ്ങളല്ലേ കൈ വെട്ടിയവർ ?" - എന്ന്‌ അവരോട്‌ പ്രത്യേകം ചോദിക്കാനും മറക്കരുത്‌.

അബസ്വരം :
ദാന ധർമ്മങ്ങൾ നൽകേണ്ടതും സഹായിക്കേണ്ടതും പാവപ്പെട്ടവരെയാണ്‌. അല്ലാതെ അക്രമികളെയല്ല !


                                                                     579
                                                                     *****
15.07.2015
"അച്ചാ ദിൻ വരാൻ 25 വർഷം എടുക്കും." - അമിത്‌ ഷാ

ഒറ്റ ബഡായി പ്രസ്താവന കൊണ്ട്‌ മുഴുവൻ സംഘികളേയും 25 കൊല്ലത്തേക്ക്‌ പറ്റിക്കാം എന്ന് അമിത്‌ ഷാക്ക്‌ ബോധ്യമായിരിക്കുന്നു. മൂപ്പർ അത്‌ കൃത്യമായി ഉപയോഗിച്ചു. അത്രയേ ഉള്ളൂ.

ഇനി 25 വർഷം കഴിഞ്ഞുള്ള പ്രഭാതത്തിനായി സംഘികൾ മുണ്ടാണ്ടെ കാത്തിരുന്നോളും !

അബസ്വരം :
എന്നാലും മൂപ്പരുടെ മണ്ട പോയ പോക്കേയ്‌ !

                                                                     580
                                                                     *****
18.07.2015
സ്രഷ്ടാവ് മനുഷ്യകുലത്തോട് ആഘോഷിക്കാന്‍ ആവശ്യപ്പെട്ട രണ്ട് ആഘോഷങ്ങളില്‍ ഒന്നായ ചെറിയ പെരുന്നാള്‍ ഒരിക്കല്‍ കൂടി നമ്മുടെ ജീവിതത്തിലേക്ക് വന്നെത്തിയിരിക്കുന്നു.

വിചാരണയുടെ ദിനത്തില്‍ നന്മയുടെ കനം കൂടാനും, തിന്മയുടെ കനം കുറയാനും കഴിയുന്ന ഒരുപാട് പ്രവര്‍ത്തനങ്ങള്‍ ഈ സുദിനത്തില്‍ നമുക്ക് ചെയ്യാന്‍ കഴിയട്ടെ എന്ന പ്രാര്‍ത്ഥനയോടെ....

റംസാനില്‍ നിന്നും ഉള്‍ക്കൊണ്ട ഊര്‍ജ്ജവും, വിശുദ്ധിയും നാളെകളിലും നമുക്ക് കാത്ത് സൂക്ഷിക്കാന്‍ കഴിയട്ടെ എന്ന പ്രാര്‍ത്ഥനയോടെ....
ഏവര്‍ക്കും ചെറിയ പെരുന്നാള്‍ ആശംസകള്‍....

അബസ്വരം :
അള്ളാഹു അക്ബറുള്ളാഹു അക്ബറുള്ളാഹു അക്ബര്‍,
ലാ ഇലാഹ ഇല്ലാള്ളാഹു അള്ളാഹു അക്ബര്‍,
അള്ളാഹു അക്ബര്‍ വലില്ലാഹില്ഹംദ്.

                                                                     581
                                                                     *****
22.07.2015
'ഗോ ആണ് മാതാവ്' എന്ന് ചെറുപ്പം മുതല്‍ കേട്ട് ശീലിച്ച് ആയ കാലത്ത് പശുവിന്റെ പിന്നാലെ പോയി സമയം വേസ്റ്റ് ആയതിലുള്ള വിഷമമാണ് സംഘി പ്രമുഖ് മുരളീധരന്‍ പങ്കുവെച്ചത്.

'ഉപയോഗിക്കാനാറിയാത്ത സാധനങ്ങള്‍ കൈവശം വെക്കുന്നത് ശിക്ഷാര്‍ഹമാണ്' എന്ന നിയമം ഉണ്ടാകാതിരുന്നത് എത്ര നന്നായി അല്ലേ സംഘികളേ ??!!

അബസ്വരം :
ഉപയോഗിക്കാനറിയാത്ത തോക്ക് എല്ലാ കാലത്തും ഒരു കാഴ്ച വസ്തു മാത്രമാണ്.


                                                                     582
                                                                     *****
23.07.2015
നോക്കുകൂലി എന്ന പ്രയോഗത്തിനു പകരം "കെ.ടി.ജലീല്‍" എന്ന പ്രയോഗം കൊണ്ടുവരേണ്ട സമയം എന്നോ അതിക്രമിച്ചിരിക്കുന്നു.

സിമിയില്‍ ജനിച്ച്, വളരാന്‍ ലീഗിനേയും പുഷ്പിക്കാന്‍ സി പി എമ്മിനേയും കൂട്ട് പിടിച്ച അവസരവാദിയായ ജലീല്‍ ആദര്‍ശ രാഷ്ട്രീയത്തെ കുറിച്ച് മുക്രയിടേണ്ട കാര്യമില്ല.

അബസ്വരം :
അധികാരം എന്നതില്‍ കവിഞ്ഞ് അവസരവാദികള്‍ക്ക് എന്ത് ആദര്‍ശം ??
അത് ജലീല്‍ ആയാലും സെല്‍വരാജ് ആയാലും !


                                                                     583
                                                                     *****
24.07.2015
നിയമസഭ, ലോക്സഭ എന്നിവിടങ്ങളിളേക്കുള്ള തിരഞ്ഞെടുപ്പുകളിൽ കോൺഗ്രസ്സും, ലീഗും എല്ലാം സ്ഥാനാർത്ഥികളെ പാർട്ടി ചിഹ്നത്തിൽ മൽസരിപ്പിക്കുമ്പോൾ, പല മണ്ഡലങ്ങളിലും തങ്ങളുടെ സ്ഥാനാർത്ഥികൾക്ക്‌ സ്വതന്ത്ര പരിവേഷം നൽകി വീമാന ചിഹ്നത്തിലും, ഗ്യാസും കുറ്റി ചിഹ്നത്തിലും ഒക്കെ മൽസരിപ്പിക്കുന്ന സി പി എം അവരുടെ ആത്മവിശ്വാസരാഹിത്യവും രാഷ്ട്രീയ പാപ്പരത്തവും തന്നെയാണ്‌ തുറന്നു കാണിക്കുന്നത്‌.

അവിടേയും ഇവിടേയും അല്ലാതെ കുടവും കുഞ്ഞിക്കയിലും ഒക്കെ ചിഹ്നമാക്കി മൽസരിച്ച്‌ ജയിക്കുന്നതിനേക്കാൾ അന്തസ്സും, ചങ്കൂറ്റവും, രാഷ്ട്രീയ ബോധവും സ്വന്തം പാർട്ടിയുടെ ചിഹ്നത്തിൽ മൽസരിച്ച്‌ തോൽക്കുന്നതിൽ ഉണ്ട്‌.
അതുകൊണ്ട്‌ തന്നെ കെ.എം.ഷാജിയുമായി താരതമ്യം ചെയ്യുകയും പൂർവ്വ കാലത്തിലേക്ക്‌ ഒന്ന് കണ്ണോടിക്കുകയും ചെയ്താൽ കെ.ടി.ജലീൽ അവസരവാദിയും സൂത്രശാലിയും ഭീരുവുമായ ഒരു അധികാരമോഹി മാത്രമാണ്‌ എന്ന് വിലയിരുത്താൻ കഴിയും.

കേന്ദ്രത്തിൽ ഒരു മന്ത്രി സ്ഥാനം തനിക്ക്‌ ഉറപ്പായാൽ സംഘിയാകുന്ന ജലീലിനേയും മ്മക്ക്‌ കാണാം.

അബസ്വരം :
ആദ്യം ഒരു തോണിയിൽ മാത്രം കാലിട്ട്‌ ഉറച്ച്‌ നിൽക്കാനുള്ള മിനിമം ആണത്തം കാണിക്കൂ ജലീലേ.

                                                                     584
                                                                     *****
24.07.2015
ശിരോവസ്ത്രം ധരിക്കണോ വേണ്ടയോ എന്നത്‌ കോടതിയല്ല തീരുമാനിക്കേണ്ടത്‌.

തന്റെ മത വിശ്വാസങ്ങൾക്കനുസരിച്ചും വ്യക്തി താൽപര്യത്തിനനുസരിച്ചും ശിരോ വസ്ത്രം ധരിക്കണോ വേണ്ടയോ എന്ന്‌ തീരുമാനിക്കാനുള്ള അവകാശം ഒരോ വ്യക്തിക്കും ഉണ്ട്‌.

ശിരോ വസ്ത്രം ധരിക്കുന്നത്‌ കോപ്പി അടിക്കാനുള്ള സാഹചര്യം ഉണ്ടാക്കും എന്നതാണ്‌ കോടതിയുടെ നിരീക്ഷണം എങ്കിൽ "പ്രവേശന പരീക്ഷ എഴുതാൻ എഴുതാൻ വരുന്നവരെല്ലാം ഉടുതുണി എടുക്കാതെ പരീക്ഷ എഴുതണം" എന്ന് നിയമം ഉണ്ടാക്കട്ടെ.

ശിരോവസ്ത്രത്തേക്കാൾ കോപ്പി അടിക്കുള്ള സാധ്യത ഉണ്ടാക്കുന്നത്‌ മറ്റു വസ്ത്രങ്ങളാണല്ലോ !

അബസ്വരം :
ശിരോവസ്ത്രം ധരിച്ചില്ലെങ്കിൽ മാത്രമല്ല, ഉടുതുണി എടുത്തില്ലെങ്കിലും, പോത്തിറച്ചി തിന്നാലും ഒന്നും ആകാശം ഇടിഞ്ഞു വീഴില്ലല്ലോ !

                                                                     585
                                                                     *****
25.07.2015
കുഴിയാനയും ആനയും തമ്മിലുള്ള ബന്ധം പോലെയാണ്‌ എം ഇ എസും, മുസ്ലിമും തമ്മിലുള്ള ബന്ധം.

സമുദായത്തിന്റെ പേര്‌ പറഞ്ഞു എം ഇ എസ്‌ ഒരുപാട്‌ നേട്ടങ്ങൾ കൊയ്ത്‌ പോക്കറ്റ്‌ വീർപ്പിക്കുന്നു എന്നതിൽ കവിഞ്ഞ്‌ എന്ത്‌ പ്രത്യേക ഗുണമാണ്‌ ഫസൽ ഗഫൂറും കൂട്ടരും മുസ്ലിം സമുദായത്തിനു നൽകുന്നത്‌ ?

ഫീസ്‌ കൂടുതൽ കിട്ടാൻ വകുപ്പ്‌ ഉണ്ടെങ്കിൽ പെൺകുട്ടികൾ അടിവസ്ത്രങ്ങൾ മാത്രം ധരിച്ച്‌ കോളേജിൽ വന്നാലും ആകാശം ഇടിഞ്ഞു വീഴുകയോ, ഇസ്ലാം വിശ്വാസത്തിന്‌ കോട്ടം സംഭവിക്കുകയോ ചെയ്യില്ല എന്ന് ഫത്‌വയുമായി ഫസൽ ഗഫൂർ വന്നാലും അത്ഭുതപ്പെടേണ്ടതില്ല.

അബസ്വരം :
സിനിമാ തിയേറ്ററുമായും, സിനിമാ ബിസിനസ്സുമായും നടക്കുന്ന തന്നിൽ നിന്നൊന്നും ഇസ്ലാം പഠിക്കേണ്ട ഗതികേട്‌ മുസ്ലിം സമുദായത്തിന്‌ വന്നിട്ടില്ല ഫസൽ ഗഫൂറേ.

                                                                     586
                                                                     *****
25.07.2015
ശിരോ വസ്ത്രം മാറ്റിയാല്‍ ഇസ്ലാമിന് പുറത്ത് പോകുമോ, അകത്ത് പോകുമോ എന്നൊന്നും കോടതി പഠിപ്പിക്കേണ്ടതില്ല. ശിരോ വസ്ത്രം ധരിക്കാന്‍ ആഗ്രഹമുള്ളവര്‍ക്ക് അത് ധരിക്കാനുള്ള അവകാശം ഉണ്ടായിരിക്കണം. അത്‌ ആധാർ കാർഡിനു ആയാലും, ഐ ഡി കാർഡിനു ആയാലും, എന്‍ട്രൻസ്‌ പരീക്ഷക്ക്‌ ആയാലും ഒരുപോലെ തന്നെ !!

സ്ത്രീകള്‍ ശിരോവസ്ത്രം ഇട്ടില്ലെങ്കിൽ കോപ്പി അടി നടക്കില്ല എങ്കില്‍ പിന്നെ ആൺ പിള്ളേര്‍ എങ്ങിനെയാണ്‌ കോപ്പി അടിക്കുന്നത് എന്നത് കൂടി കോടതി വ്യക്തമാക്കേണ്ടതാണ്.

അബസ്വരം :
ആകാശം ഇടിഞ്ഞു വീഴാതെ നോക്കാനാണ്‌ ജഡ്ജി അദ്ധേഹവും ഭാര്യയും മക്കളും അതിനു ഓശാന പാടുന്നവരും വസ്ത്രം ധരിച്ചു നടക്കുന്നത്‌ എങ്കിൽ ആ വസ്ത്രം ഊരി കളഞ്ഞ്‌ ഉടുതുണിയില്ലാതെ നടക്കാൻ തയ്യാറാവണം. അങ്ങിനെ സുപ്രീം കോടതി ജഡ്ജിയും മൂടുതാങ്ങികളും തുണിയില്ലാതെ നടന്നത്‌ കൊണ്ട്‌ ആകാശം ഇടിഞ്ഞു വീണാൽ അതിന്റെ ഉത്തരവാദിത്വം എന്നിൽ ചാർത്തി എനിക്കെതിരെ നിയമ നടപടി സ്വീകരിക്കുകയും വേണമെന്ന് ഇതിനാൽ അറിയിച്ചു കൊള്ളുന്നു.


                                                                     587
                                                                     *****
26.07.2015
"ശിരോവസ്ത്രം : സുപ്രിം കോടതി നിര്‍ദേശം പാലിക്കാന്‍ കഴിയാത്തവര്‍ പൗരത്വം ഉപേക്ഷിക്കണം." - വി.മുരളീധരന്‍.

സംഘികള്‍ ഭരിക്കുമ്പോള്‍ സുപ്രീംകോടതിയേയും സംഘിവല്‍ക്കരിക്കുന്ന കാഴ്ചയാണ് നാം കാണുന്നത്. ശിരോവസ്ത്രം ഉപേക്ഷിപ്പിക്കല്‍ പരിപാടി സുപ്രീംകോടതിയെ കൊണ്ട് ചെയ്യിപ്പിക്കുന്നതിനെ പിന്നിലെ ഉദ്ദേശ്യം ഇപ്പോഴെങ്കിലും ബോധമുള്ളവര്‍ക്ക് മനസ്സിലാവുന്നുണ്ടാവും.

"ഇത്തരം ഉത്തരവുകള്‍ക്ക് പിന്നില്‍ മോഡി സര്‍ക്കാരിന്റെ ഇടപെടല്‍ ഇല്ല" എന്ന് ഇപ്പോഴും പറഞ്ഞു നടക്കുന്നവര്‍ രണ്ടു കൂട്ടരാണ്.

ഒന്ന് - സംഘികള്‍.
രണ്ട് - ചിന്തിക്കാനായി തലയില്‍ കളിമണ്ണ് മാത്രം അവശേഷിക്കുന്നവര്‍.


അബസ്വരം :

എടോ പശു പുത്രന്‍ മുരളീധരാ, ഇവിടെ ഓരോരോ മതവിശ്വാസികളും അവരുടെ ആചാരങ്ങള്‍ക്ക് അനുസരിച്ച് ജീവിക്കും. മുസ്ലിംങ്ങള്‍ ഇസ്ലാം വിശ്വാസങ്ങള്‍ക്ക് അനുസരിച്ച് ജീവിക്കുന്നത് കാണാന്‍ ഉള്ള സഹിഷ്ണുത തനിക്ക് ഇല്ലെങ്കില്‍ നീ ഇസ്ലാം ഇല്ലാത്ത വല്ല രാജ്യത്തും പോയി പൌരത്വം എടുത്ത് അവിടെ ജീവിച്ച് ആത്മനിര്‍വൃതി അടഞ്ഞോടാ !

                                                                     588
                                                                     *****
27.07.2015
ലോകചരിത്രത്തില്‍ ശാസ്ത്രജ്ഞ്യനായും, ഭരണകര്‍ത്താവായും സ്വന്തം പേര് സുവര്‍ണ്ണ ലിപികളാല്‍ എഴുതി ചേര്‍ത്ത എ.പി.ജെ.അബ്ദുല്‍ കലാം ഭൂമിയിലെ പരീക്ഷണങ്ങള്‍ കഴിഞ്ഞ് നാഥനിലേക്ക് മടങ്ങി.

അബസ്വരം :
ഇന്നാലില്ലാഹി വഇന്നാ ഇലൈഹി റാജിഊന്‍.

                                                                     589
                                                                     *****

28.07.2015
മരിച്ചവൻ അവന്റെ നാഥനിലേക്ക്‌ മടങ്ങി കഴിഞ്ഞു. ഇനി അയാൾ സ്വർഗ്ഗത്തിലോ നരകത്തിലോ എന്നൊക്കെ പടച്ചോൻ തീരുമാനിച്ചോളും. അതിനെ കുറിച്ചല്ല മ്മൾ ബേജാറാവേണ്ടത്‌.

അബസ്വരം :
മ്മൾ സ്വർഗ്ഗത്തിൽ എത്തുമോ എന്നതിനെ കുറിച്ച്‌ ചിന്തിക്കാൻ ആ സമയം ഉപയോഗിച്ചിരുന്നു എങ്കിൽ....!

                                                                     590
                                                                     *****
29.07.2015
രാജ്യത്തെ ഒരു പൌരനോട് മറ്റൊരു പൌരന്‍, 'രാജ്യം വിടണം', 'പൌരത്വം കളയണം', എന്നൊക്കെ പറയുന്നുണ്ട് എങ്കില്‍ അത് യഥാര്‍ത്ഥത്തില്‍ ക്രിമിനല്‍ കുറ്റമായി പരിഗണിക്കേണ്ടതല്ലേ ?

ഇത്തരം പരാമര്‍ശങ്ങള്‍ നടത്തുന്നത് ഭീകരവാദവും, തീവ്രവാദവും അല്ലേ ?

ഒരു രാജ്യത്ത് ഒരു പൌരന് ജീവിക്കാനുള്ള അവകാശം മറ്റൊരു പൌരന് ചോദ്യം ചെയ്യാന്‍ എന്ത് അവകാശം ???

അബസ്വരം :
മുളയിലേ നുള്ളേണ്ടത് മുളയിലേ നുള്ളേണ്ടേ ?

                                                                     591
                                                                     *****
29.07.2015
ഒരുപാട്‌ നിരപരാധികളുടെ ജീവൻ എടുത്ത ബോംബെ കലാപത്തിൽ യാക്കൂബ്‌ മേമൻ കുറ്റക്കാരനാണെങ്കിൽ പരമാവധി ശിക്ഷയായ കഴുമരം തന്നെ അദ്ധേഹത്തിനു സമ്മാനിക്കണം.

എന്നാൽ അതിനു മുൻപേ കഴുമര സമ്മാനം നൽകാൻ അർഹരായ മറ്റു ചിലരുണ്ട്‌.

ബോംബെ കലാപമടക്കം നിരവധി കലാപങ്ങളിലേക്കും, രക്ത ചൊരിച്ചിലുകളിലേക്കും രാജ്യത്തെ തള്ളി വിട്ടതിന്റെ മൂലകാരണമായ ബാബ്‌രി മസ്ജിദ്‌ തകർക്കലിനു പ്രേരണ നൽകുകയും, നേതൃത്വം നൽകുകയും ചെയ്ത അദ്വാനികളും ജോഷികളും ഉമാഭാരതിമാരും എല്ലാം കഴുമര സമ്മാനം സ്വന്തമാക്കുന്നതിനു മുൻപ്‌ യാക്കൂബ്‌ മേമനു കഴുമരം സമ്മാനിച്ചാൽ അത്‌ നീതികേടാവില്ലേ ?
സമ്മാനം അർഹിക്കുന്നവർക്ക്‌ അത്‌ ഓർഡറിൽ നൽകാതെ, വരിയിൽ നിന്ന് ചിലരെ മാത്രം തിരഞ്ഞെടുത്ത്‌ സമ്മാനം നൽകുന്നത്‌ അന്യായമല്ലേ ?
സമ്മാനം ഭാരത രത്നമായാലും കഴുമരമായാലും !

അബസ്വരം :
നീതിയും ന്യായവും ഒരു ഓർഡറിൽ നടപ്പാക്കുന്നതല്ലേ അതിന്റെ നീതിയും ന്യായവും യുവർ ഓണർ ?

                                                                     592
                                                                     *****
30.07.2015
ബോംബെ കലാപത്തിന്റെ ഗൂഢാലോചകനു തൂക്കുകയർ സമ്മാനമായി ലഭിച്ചപ്പോൾ, ഗുജറാത്ത്‌ കലാപത്തിന്റെ ഗൂഢാലോചകന്‌ സമ്മാനം രാജ്യത്തിന്റെ പ്രധാനമന്ത്രി സ്ഥാനം !

എന്താല്ലേ നിയമ വ്യവസ്ഥയുടെ ഒരു ശുഷ്ക്കാന്തി ?

അബസ്വരം :
ആയിരം താക്കറേമാർ രക്ഷപ്പെട്ടാലും, ഒരു മേമൻ കൂടി ശിക്ഷിക്കപ്പെടാതിരിക്കരുത്‌.

                                                                     593
                                                                     *****
30.07.2015
കണ്ടം ബെച്ചൊരു നീത്യാണ്‌ പണ്ടേണ്ടാക്കിയ നീത്യല്ല
സംഘിക്കാരുടെ നീത്യാണ്‌ ഇത്‌ നാട്ടില്‌ മുഴുവൻ പാട്ടാണ്‌

കൊലയാളികളെ തൂക്കിക്കൊല്ല്‌ണ ജഡ്ജിമാരുടെ നീത്യല്ല
ആളും തരവും മതവും നോക്കി തൂക്കിലേറ്റ്‌ണ നീത്യാണ്‌
കോടതീലിരിക്ക്‌ണ വൻ ജഡ്ജീ ജഡ്ജീ നീയിത്‌ കേട്ടാട്ടേ
ഇത്‌ നീതിയെന്ന് പറയാൻ വന്നാൽ നിന്നെ കാർക്കിച്ച്‌ തുപ്പും ജഡ്ജ്യേട്ടാ

ഇന്ത്യക്കാരുടെ നീത്യല്ലാ ഇത്‌ സംഘികൾ സുഖിക്ക്‌ണ നീത്യാണ്‌
മോഡിക്കല്‌പ്പന കേട്ട്‌ നടക്ക്‌ണ ജഡ്ജിമാരുടെ നീത്യാണ്‌
വർഷം കുറേയായ്‌ നീതിക്കകത്ത്‌ സംഘി പാറ്റകളിരിക്കുന്നു
നീതിയും തിന്ന് ന്യായവും തിന്ന് രാജ്യവും കൂടി തിന്നല്ലേ !

അബസ്വരം :
ആത്മഹത്യ ചെയ്ത ഇന്ത്യൻ നീതിവ്യവസ്ഥക്ക്‌ ആദരാജ്ഞ്യലികൾ.

                                                                     594
                                                                     *****
31.07.2015
എല്ലാ കേസുകളിലെ പ്രതികള്‍ക്കും കൃത്യമായ ശിക്ഷ ലഭിക്കുന്നുണ്ട് എങ്കില്‍ ആര്‍ക്കും പരാതി ഉണ്ടാവില്ല. എന്നാല്‍ ചില പ്രതികള്‍ക്ക് വധശിക്ഷ ശുഷ്കാന്തിയോടെ നടത്തുകയും, ചിലരെ കഴുമരത്തില്‍ നിന്ന് ഒഴിവാക്കുകയും ചിലരെ രാജ്യം ഭരിക്കാന്‍ അയക്കുകയും ചെയ്യുന്നതാണ് പ്രധാന വിഷയം.

അല്ലാതെ കുറ്റം ചെയ്തവനെ പൂവിട്ടു പൂജിക്കണം എന്നോ പുണ്യാളന്‍ ആക്കണം എന്നോ ഉള്ള ആവശ്യം ഇല്ല. മേമന്‍ ആയാലും അദ്വാനി ആയാലും മോഡി ആയാലും ഉമാഭാരതി ആയാലും മുരുകന്‍ ആയാലും ഞാന്‍ ആയാലും ജീവന്‍ എടുക്കുകയും അതിനു കൂട്ട് നില്‍ക്കുകയും ചെയ്യുന്നവന്‍ അര്‍ഹിക്കുന്നത് മരണം തന്നെയാണ്.

അബസ്വരം :
കഴുമരം ജനറല്‍ സീറ്റ് ആകണം. സംവരണ സീറ്റ് ആകരുത്.

                                                                     595
                                                                     *****
02.08.2015
"നിലവിളക്ക് വിവാദത്തിന് പിന്നാലെ അന്തരിച്ച മുൻ രാഷ്ട്രപതി ഡോ.എ.പി.ജെ.അബ്ദുൾ കലാമിനോട് ലീഗ് മന്ത്രിയുടെ പരസ്യ അനാദരവ്. പെരുമ്പാവൂർ എൻ.എസ്.എസ് ഓഡിറ്റോറിയത്തിൽ സംഘടിപ്പിച്ച അനുസ്മരണ ചടങ്ങിലാണ് കുട്ടികൾ നിറഞ്ഞ സദസ്സിന് മുൻപിൽ പൊതുമരാമത്ത് വകുപ്പ് മന്ത്രി വി.കെ.ഇബ്രാഹിംകുഞ്ഞ് പുഷ്പാർച്ചന നടത്താൻ വിസമ്മതിച്ചത്." - വിസര്‍'ജനം ടിവി".

പുഷ്പാര്‍ച്ചന ചെയ്യുന്നതാണ് ആദരവിന്റെ ലക്ഷണവും മാനദണ്ഡവും എങ്കില്‍ ആ ആ ആദരവ് കൊടുക്കാന്‍ സൗകര്യം ഇല്ല എന്ന് ഇതിനാല്‍ മ്മളും അറിയിക്കുന്നു.

അബസ്വരം :
മോഡിയും, സംഘികളും കലാമിന്റെ മയ്യത്ത് നിസ്കരിക്കാതിരുന്നതും അനാദരവിന്റെ ഗണത്തില്‍ വരുമോ വിസര്‍ജിസ്റ്റുകളേ ??

                                                                     596
                                                                     *****
03.08.2015
'തുണിയൂരൽ കം പൊലാട്ട്‌ ' സൈറ്റുകൾ നിരോധിച്ചത്‌ നല്ല കാര്യം തന്നെ.
എന്നാൽ അതിനോടൊപ്പം ചുവന്ന തെരുവുകളും, സിനിമകളിലെ തുണിയൂരലുകളും നിരോധിക്കാനുള്ള ആർജ്ജവം സർക്കാറിനു ഉണ്ടോ ?

അബസ്വരം :
കല്ലുകളിൽ കൊത്തിയെടുത്ത പോണുകളും നിരോധിക്കേണ്ട പോണല്ലേ സർക്കാരേ ?


                                                                     597
                                                                     *****
04.08.2015
"ആയിരം തിരഞ്ഞെടുപ്പുകളില്‍ തോറ്റാലും, ഒരു സമുദായ നേതാവിന്റേയും തിണ്ണ നിരങ്ങാന്‍ കമ്മ്യൂണിസ്റ്റ്കാരെ കിട്ടില്ല." -  പിണറായി വിജയന്‍


അത് ശരിയാ സഖാവേ.
യഥാര്‍ത്ഥ കമ്മ്യൂണിസ്റ്റ് എന്നാല്‍ അതൊക്കെയാ.
വോട്ട് കിട്ടാന്‍ വേണ്ടി യേശുവിന്റേയും മറ്റു മതാചാര്യന്‍മാരുടേയും ഫോട്ടോ വെക്കാത്തവന്‍ ആണ് കമ്മ്യൂണിസ്റ്റ്. പാര്‍ട്ടി നേതൃത്വത്തിനെ വിമര്‍ശിക്കുന്ന മുന്‍ പാര്‍ട്ടി മെമ്പറെ വെട്ടിക്കൊല്ലുന്നവനാവരുത് കമ്മ്യൂണിസ്റ്റ്. അവസരവത്തിന് അനുസരിച്ച് അടവുനയം ഉണ്ടാക്കുന്നവനാവരുത് കമ്മ്യൂണിസ്റ്റ്. നിയമസഭ തല്ലിതകര്‍ക്കുന്നവനാകരുത് കമ്മ്യൂണിസ്റ്റ്. ആരാന്റെ മക്കളെ സമരം ചെയ്യാന്‍ വിട്ട് സ്വന്തം മക്കളെ വിദേശത്ത് പഠിക്കാന്‍ അയക്കുന്നവനാവരുത് കമ്മ്യൂണിസ്റ്റ്. പാവപ്പെട്ട കര്‍ഷകര്‍ ആത്മഹത്യ ചെയ്യുമ്പോള്‍ അമ്യൂസ്മെന്റ് പാര്‍ക്കും ചാനലും നടത്തി ഗീര്‍വാണം അടിക്കുന്നവന്‍ ആകരുത് കമ്മ്യൂണിസ്റ്റ്. യഥാര്‍ത്ഥ കമ്മ്യൂണിസ്റ്റ് എന്നാല്‍ ഒരുപാട് മൂല്യങ്ങള്‍ ഉള്ള വ്യക്തി ആയിരിക്കണം.
എന്നാല്‍ അങ്ങും അങ്ങയുടെ പാര്‍ട്ടിയും ചെയ്യുന്ന പണി ഇതൊന്നും അല്ലല്ലോ ??
അങ്ങും അങ്ങയുടെ പാര്‍ട്ടിയും "കമ്മ്യൂണിസ്റ്റ്" എന്ന് പറഞ്ഞു ചെയ്യുന്ന പണി യഥാര്‍ത്ഥ കമ്മ്യൂണിസം അല്ല എന്ന് അങ്ങ് തിരിച്ചറിയുന്നുണ്ട് എങ്കില്‍ വളരെ നല്ലത്.

തിരഞ്ഞെടുപ്പുകള്‍ അടുക്കുമ്പോള്‍ അങ്ങും അങ്ങയുടെ പരിവാരങ്ങളും എന്‍ എസ് എസ് മുതല്‍ പി ഡി പി വരെ ഉള്ളവരുടെ തിണ്ണനിരങ്ങിയ ചരിത്രം ഒക്കെ അങ്ങേക്കും ഓര്‍മയുണ്ടാവുമല്ലോ അല്ലേ ? ഹംസാക്കാനേയും, ഹുസ്സൈന്‍ രണ്ടത്താണിയേയും ജയിപ്പിക്കാന്‍ കാന്തപുരത്തിന്റെ തിണ്ണയും അങ്ങ് നന്നായി നിരങ്ങിയതും മറന്നിട്ടുണ്ടാവില്ലല്ലോ അല്ലേ ?

അബസ്വരം :
അതുകൊണ്ട് ഇനിയെങ്കിലും അങ്ങും അങ്ങയുടെ പാര്‍ട്ടിയും ചെയ്യുന്നതും പ്രവര്‍ത്തിക്കുന്നതും അല്ല യഥാര്‍ത്ഥ കമ്മ്യൂണിസം എന്ന വസ്തുത, യഥാര്‍ത്ഥ കമ്മ്യൂണിസം എന്തെന്ന് മനസ്സിലാക്കാത്ത അങ്ങയുടെ പാര്‍ട്ടിയുടെ ഫാന്‍സ്‌ അസോസിയേഷന്‍ അംഗങ്ങള്‍ക്ക് പഠിപ്പിച്ച് കൊടുക്കണം.
അങ്ങേക്ക് അതിനുള്ള വകതിരിവും ബോധവും പടച്ചോന്‍ നല്‍കട്ടെ.

                                                                     598
                                                                     *****
05.08.2015
"സര്‍ക്കാര്‍ പദ്ധതികളുടെ പ്രചരണത്തിനായി കേന്ദ്ര സര്‍ക്കാര്‍ യാചകരെ ഇറക്കുന്നു. ബസ്സുകളിലും ട്രെയിനുകളിലും സ്വച്ച് ഭാരത്‌, ബേട്ടി ബച്ചാവോ, ബേട്ടി പഠാവോ പ്രചരണ ഗാനങ്ങള്‍ പാടാന്‍ യാചകര്‍ക്ക് പരിശീലനം നല്‍കും." - വാര്‍ത്ത.

യാചകരെ പുനരധിവസിപ്പിക്കുകയും, യാചന ഇല്ലാതാക്കാന്‍ പരിശ്രമിക്കുകയും ചെയ്യുന്നതിന് പകരം, യാചകരെ യാചിക്കുമ്പോള്‍ പാടേണ്ട പാട്ട് പഠിപ്പിക്കുന്ന ദിനമാണോ പാവങ്ങള്‍ കാത്തിരുന്ന അഛാ ദിനം മോഡി സാഹിബ് ??

ഇനി ലൈംഗിക തൊഴിലാളികള്‍ക്കും ഈ പാട്ട് പഠിപ്പിച്ച് കൊടുക്കണം. അവരും പണി എടുക്കുമ്പോള്‍ ഈ പാട്ടുകള്‍ പാടട്ടെ. അപ്പോള്‍ ഇവക്കൊക്കെ കൂടുതല്‍ പ്രചാരം ലഭിക്കും !!

അബസ്വരം :
'അച്ചാദിന്‍' ഈ കോലത്തില്‍ ആയാല്‍ 'മുത്തച്ചാദിന്‍' ഏത് കോലത്തിലാവും മക്കളേ ??`

                                                                     599
                                                                     *****
06.08.2015
നമോലി നാട് വാണിടും കാലം
സംഘിയും ഗോക്കളുമൊന്ന് പോലെ
ആമോദത്തോടെ വസിക്കും കാലം
അച്ഛാദിനങ്ങാളാര്‍കുമൊട്ടില്ല താനും

നമോലി നാട് വാണിടും കാലം
സംഘിയും ഗോക്കളുമൊന്ന് പോലെ
ആമോദത്തോടെ വസിക്കും കാലം
അച്ഛാദിനങ്ങാളാര്‍കുമൊട്ടില്ല താനും

ബീഫുകള്‍ പോണുകള്‍ ഒന്നുമില്ല
മതേതരത്വമോ കേള്‍ക്കാനില്ല
ദുഷ്ടരെ ജയിലില്‍ കാണ്മാനില്ല
ക്യാമറയല്ലാതെ ഇല്ല പാരില്‍… ഇല്ല പാരില്‍

നമോലി നാട് വാണിടും കാലം
സംഘിയും ഗോക്കളുമൊന്ന് പോലെ
ആമോദത്തോടെ വസിക്കും കാലം
അച്ഛാദിനങ്ങാളാര്‍കുമൊട്ടില്ല താനും

സത്യവുമില്ല നീതിയുമില്ല
എള്ളോളമില്ല ജനവചനം
സെല്‍ഫികോലാദികള്‍ കുറുവടികളും
എല്ലാം കണക്കിന് തുല്യമായി… തുല്യമായി

നമോലി നാട് വാണിടും കാലം
സംഘിയും ഗോക്കളുമൊന്ന് പോലെ
ആമോദത്തോടെ വസിക്കും കാലം
അച്ഛാദിനങ്ങാളാര്‍കുമൊട്ടില്ല താനും

കള്ളഫോട്ടോയും പരസ്യാഴിയും
വിദേശയാത്രകള്‍ മറ്റൊന്നുമില്ല
കള്ളപ്പണവുമില്ല സബ്സിഡിയുമില്ല
എള്ളോളമില്ല സ്വഛ് ഭാരതം…വൃത്തി ഭാരതം

നമോലി നാട് വാണിടും കാലം
സംഘിയും ഗോക്കളുമൊന്ന് പോലെ
ആമോദത്തോടെ വസിക്കും കാലം
അച്ഛാദിനങ്ങാളാര്‍കുമൊട്ടില്ല താനും

അബസ്വരം :
പിച്ചക്കാര്‍ക്ക് പാടാന്‍ വേണ്ടി തയ്യാറാക്കിയ അച്ചാദിന്‍ ഗാന്‍ !!

                                                                     600
                                                                     *****
07.08.2015
'ലൈംഗിക ജിഹാദിന് ' വിസമ്മതിച്ച 19 യുവതികളെ ഐ.എസ് തീവ്രവാദികള്‍ കൊലപ്പെടുത്തിയതായി കുര്‍ദിഷ് അധികൃതര്‍. - മാതൃഭൂമി വാര്‍ത്ത.


എന്റെ പൊന്നാര മാതൃഭൂമീ, സമ്മതിച്ചു !! പൊലാട്ട് ജിഹാദ് എന്ന പദം ആണെങ്കില്‍ ഒന്നുകൂടി ഉഷാറായിരുന്നു !!

അബസ്വരം :

ബൈ ദ ബൈ, ഇത്തരം തലക്കെട്ടും വാര്‍ത്തകളും നല്‍കുന്നതിനെ "പൊലാട്ട് മാധ്യമ പ്രവര്‍ത്തനം" എന്ന് തന്നെയല്ലേ വിളിക്കേണ്ടത് ?


അബസ്വരസംഹിതയുടെ മുന്‍ഭാഗങ്ങള്‍ക്ക് ഇവിടെ ക്ലിക്കുക

2 comments:

  1. നമോലി നാട് വാണിടും കാലം

    സംഘിയും ഗോക്കളുമൊന്ന് പോലെ

    ആമോദത്തോടെ വസിക്കും കാലം

    അച്ഛാദിനങ്ങാളാര്‍കുമൊട്ടില്ല താനും


    ബീഫുകള്‍ പോണുകള്‍ ഒന്നുമില്ല

    മതേതരത്വമോ കേള്‍ക്കാനില്ല

    ദുഷ്ടരെ ജയിലില്‍ കാണ്മാനില്ല

    ക്യാമറയല്ലാതെ ഇല്ല പാരില്‍… ഇല്ല പാരില്‍

    ReplyDelete
  2. One of the best read i had today.thank you..

    ReplyDelete

നിങ്ങളുടെ വിമര്‍ശനങ്ങളും അഭിപ്രായങ്ങളും നിര്‍ദ്ദേശങ്ങളും ഇവിടെ പങ്കുവെക്കാന്‍ മറക്കരുതേ....